2,5 милиони денари обесштетување за поплавените објекти во Новаци

Општина Новаци ги исплати штетите од поплавите што во периодот јануари-април минатата година зафатија семејни куќи и придружни објекти, пишува МИА.

Како што истакна денеска градоначалникот Лазар Котевски, исплаќањето се реализира со одлука на Владата, а средствата се обезбедени од државниот буџет.

– Поднесени беа 68 барања, 56 за првата поплава која се случи во периодот од 28 јануари до 8 февруари, и уште 12 за втората голема поплава од 29 март до 20 април. Сите баратели се обесштетени со вкупен износ од 2,5 милиони денари, рече Котевски.

Минатата година пелагониската општина Новаци во два наврата ја зафати поплава од досега невидени размери. Жителите имаа пријавено околу 300 барања за обесштетување на земјоделски посеви и површини, 68 барања за поплавени објекти, а една куќа беше целосно уништена.

Доколку преземете содржина од оваа страница, во целост сте се согласиле со нејзините Услови за користење.