При проверка на патнички возила полицијата во два одделни случаи во близина на Неготино и кај селото Смоквица регистрирала вкупно 17 мигранти.
На автопатот во близина на селото Смоквица вчера околу 7:50 чaсот полициски службеници забележале возило „Рено“ со скопски таблици во кое влегувале повеќе мигранти. Полицијата се обидела да го сопре возилото, но возачот продолжил да се движи. На околу 300 метри возачот го запрел возилото и заедно со дел од мигрантите се дал во бегство. Полицијата ги пронашла и привела 12 -те мигранти од Алжир кои потоа биле спроведени во Прифатниот центар за странци-Скопје.
Полицаец од Неготино вчера околу 20:35 часот во близина на клучката кај Неготино на автопатот во правец Гевгелија – Скопје се обидел да запре возило марка „Матиз“ со велешки регистерски ознаки, но возачот не застанал туку го продолжил движењето.
Полицијата со службено возило се упатила по него и кај месноста викана „Полна Цигла“ го престигнала и запрела. Во возилото биле затекнати возачот М.Ѓ. (32) и пет мигранти кои потоа се спроведени во Прифатниот центар за странци-Скопје.
Се работи на целосно расчистување на овие случаи.