Протестот организиран од најголемата опозициска партија СДСМ против Уставниот суд заврши. Според последните информации од терен пред МНТ има уште околу 30-тина лица поддржувачи на СДСМ.
Полициски кордон поладнево пред Музејот на ВМРО ги спречи опозициските протестанти кои беа упатени кон Уставниот Суд, каде што беше организиран народен собир од ГРОМ, кој се уште трае.
Медиумите кои важат за блиски на опозицијата пренесуваат дека дел од протестантите одлучиле ноќта да ја поминат пред Македонскиот народен театар, каде симболично ќе одржат бдеење за “одбрана на Уставот“.
Од другата страна, повеќе здруженија предвоени од ГРОМ велат дека ќе го чуваат Уставниот суд, а со тоа и уставниот поредок. Тие сметаат дека никој нема право да врши притисок на институциите и да му забранува на уставниот суд да донесе одлука кој треба да си ја работи својата работа.
Со транспаренти „Држава сме, не сме протекторат“, „Рацете подалеку од судството“, „Судството на судиите“, повеќе од 6.000 граѓани вечерва се собраа пред Уставниот суд, а со намера да им изразат поддршка на уставните судии в очи утрешната одлука за измени во Законот за помилување.