Околу 269.000 тони пластичен отпад пловат на површината на океаните во светот, покажува истражувањето на меѓународните експерти, објавено денеска во американското издание „Плос Ван“, пишува МИА.
Експерти од пет земји собирале податоци од 24 експедиции, кои биле извршени во период од шест години, од 2007 до 2013 година во целиот свет.
Според нив, пластичниот отпад во океаните го има во многу поголема количина, отколку што тоа досега се сметаше. Во морињата пловат кеси, шишиња, играчки, затворачи за шишиња, четки за заби и многу други работи.
Пластичниот отпад е закана за морските птици, морските цицачи и другите живи суштества во морињата. Отпадоците во океаните пристигнуваат од реките и од мошне загадените зони, како и од бродовите.
Отпадоците често пати се собираат во петте суптропски вртлози, големи области во кои водата се врти во круг во северниот и јужниот дел на Тихиот Океан, во северниот и јужниот дел на Атлантскиот Океан и во Индискиот Океан. Тие зони дејствуваат како големи блендери, кои буквално ги мелат големите парчиња пластика и потоа ги исфрлаат како микрочестички насекаде во океаните.