Свет

30 лидери на странски држави на Пaрада на победата во Москва

30 лидери на странски држави на Пaрада на победата во Москва

Рускиот претседател Владимир Путин во салата со грбовите во Кремљ ги прими странските лидери кои дојдоа во Москва за чествување на 70-годишнината од победата над нацистичка Германија и сите заедно се упатија кон Црвениот плоштад, за да ги заземат местата на централната трибуна за Парадата на победата, пренесе ТАСС.

Во Москва пристигнаа околу 30 лидери на странски држави и меѓународни организации.

На Црвениот плоштад Путин ќе оддржи говор пред гостите и околу 2.300 ветерани од војните и со минута молчење ќе им оддаде почит на загинатите во Великата татковинска војна.

Прославата на Денот на победата беше подготвувана со месеци во сенка на украинската криза и одлуката на голем број западни лидери да не присуствуваат на парадата, но според најавите од Кремљ, Москва и граѓаните на Русија се подготвени да го прослават празникот и да ги дочекаат гостите, пренесе Танјуг.

Меѓу гостите на парадата во Москва ќе бидат шефовите на државите од ЗНД, Азија, лидерите на членките на БРИКС, вклучувајќи го и кинескиот претседател Кси Џинпинг, претседателите на балканските земји, Кипар, генералниот секретар на ОН, Бан Ки Мун, а учеството го најави и грчкиот премиер Алексис Ципрас, а кубанскиот претседател Раул Кастро прв од поканетите светски лидери допатува во посета на Русија, уште во вторникот.

На денешната парада учествуваат повеќе од 140 борбени авиони и хеликоптери, а не сметајќи ја пробата, првпат ќе бидат прикажани и борбените авиони од четвртата „плус плус“ генерација, „Су-30“ и „Су-35“, како и модернизираните јуришни хеликоптери „Ми-35М“ и школскиот „Ансат-У“.

Традиционално на парадата учествуваат и акробатските групи „Руски витези“ и „Стрижи“, кои, како што се очекува, ќе го прикажат „кубанскиот дијамант”, формација од девет борбени авиони „Су-27“ и „Миг-29“.

Како една од главните атракции Русија ќе го прикаже и тенкот од новата генерација „Армата Т-14“, а производителот на огнено оружје „Калашњиков“ ќе ја претстави модерниираната верзија на јуришната пушка „АК-74М“, за која тврди дека ќе биде 50 отсто попрецизна во однос на постарата верзија