Ачковска: Прислушувањето би било смешно доколку не е смислено за да го наруши угледот на државата

Универзитетската професорка Виолета Ачковска синоќа се обрати на трибината на Граѓанското движење за одбрана на Македонија во Кавадарци.

Таа истакна дека треба цврсто да се застане зад македонското национално единство и дека позадината на сето она што се прави е разнебитување на македонското национално ткиво.

– Тоа сакаат и сега да ни го направат со целата оваа трагикомедија која се случува од оваа бескрвна и безидејна опозиција. Позадината на сево ова што се прави е многу страшна. Тотално разнебитување на македонското национално ткиво, рече Ачковска, додавајќи дека е многу полесна одбраната од надворешниот, отколку од внатрешниот непријател.

Како граѓанско движење, додаде Ачковска, сметаме дека сите политички борби треба да се одвиваат во Парламентот.

– Треба да се почитува волјата на граѓаните на Република Македонија. Тие знаат да наградат и да казнат. Народот не греши, мудар е и не дозволува никој да си игра со него, рече Ачковска.

Таа изрази надеж дека во опозицијата ќе се најдат чесни луѓе кои ја сакаат Македонија.

– Сето ова прислушување би било смешно доколку не е смислено за да го наруши угледот на нашата држава и да ја направи ранлива, додаде таа.

 

Доколку преземете содржина од оваа страница, во целост сте се согласиле со нејзините Услови за користење.