Претседателот на Собранието, Трајко Вељаноски, денеска ја одржа Конститутивната седница на Секцијата на Собранието на Република Македонија во Парламентарното собрание на Франкофонијата за новиот парламентарен мандат 2014-2018.
Собраниската прес-служба информира дека Секцијата ја сочинуваат пратеници кои се служат со францускиот јазик и таа се основа заради учество во Парламентарното собрание на Франкофонијата и за размена на искуства со парламентите и органите на Организацијата на Франкофонијата и франкофонските земји.
На денешната седница за претседател на Секцијата беше избран Џеват Адеми.
Парламентарното собрание на Франкофонијата е претставничко собрание на Меѓународната организација на Франкофонијата и е нејзино консултативно собрание. Во Парламентарното собрание се претставени 81 парламенти на држави, покраини, региони и меѓународни оргнизации. Република Македонија се стекна со статус на асоциран член во Меѓународната агенција за Франкофонија на Осмиот самит одржан во 1999 година, а во 2000 година Собранието на Република Македонија беше примено за асоцијативен член на Парламентарното собрание на Франкофонијата. Секцијата на Собранието на Република Македонија во Парламентарното собрание на Франкофонијата е основана во јануари 2001 година.