Собранието на Република Македонија денеска ја презентираше публикацијата „Мојот пратеник“ за периодот мај – декември 2014 година. Овој состав на Парламентот е карактеристичено по неучеството на 31 пратеник во оставка од опозицијата во неговата работа, пишува МИА.
Во овој период се одржани вкупно 29 седници, 24 работни, три за пратенички прашања и две обраќања. Завршени се 26, а незавршени три. Донесени се вкупно 153 закони, од кои 84 од економската област, од јавните дејности 46 и 23 од политички систем.
Според извештајот, најмногу оправдани отсуства во новиот собраниски состав имал пратеникот и лидер на ДУИ Али Ахмети, кој присуствувал само на четири од вкупно 29 седници, и ниту еднаш не се обратил од говорницата. На листата на пратеници со најмногу оправдани отстуства од пленарните седници освен Ахмети се и Хазби Лика и Ермира Мехмети исто така од ДУИ, пратеникот и лидер на ДПА Мендух Тачи, Слаѓана Митовска и Ристо Манчев од СДСМ и Љубица Буралиева, која на собраниската веб-страница е запишана како независен пратеник, а доаѓа од листата на СДСМ и коалицијата, пренесе МИА.
Најголем број пратенички прашања имаат поставено Никола Мицевски, Светлана Карапетрова, Антонијо Милошоски, Зоран Илијоски и Нола Исмајлоска, сите од ВМРО-ДПМНЕ.
Талат Џафери од ДУИ (5), Илија Димовски (4), Драган Цуклев (3) и Ромео Тренов (3) од ВМРО-ДПМНЕ имаат поднесено најмногу предлог – закони до Собранието во периодот мај-декември. Најмногу амандмани имаат поднесено пратениците од ДПА над 260.
Пратеничката Роза Топузовска Каревска се јавила најмногу за дискусии, а таа исто така имала и најголем број реплики, контрареплики и процедурални интервенции. Меѓу пратениците кои најмногу се јавиле за збор се и Зоран Илијоски, Лилјана Затуровска, Владимир Ѓорчев и Ѓорѓи Коџобашиев од ВМРО-ДПМНЕ и Владанка Авировиќ од Социјалистичка партија. Освен Топузовска Каревска, со најмногу реплики биле и Солза Грчева, Лилјана Поповска и Илија Димовски, објави МИА.
Освен 31 опозициски пратеник и Ахмети, во новиот парламентарен состав воопшто не дискутирале и Мендух Тачи, Зулфи Адили, Газменд Алији, Ернад Фејзулаху, Имер Алиу, Мерал Узеири Ферати и Хазби Лика.
Триесет пратеници се на листата кои немаат отсуство од пленарните седници, а публикацијата содржи и податоци за работата на собраниските комисии.