Ако сака да го згрижи Хоџа, нека го вработи во „Тотал Инженеринг“

Лидерот на ВМРО-ДПМНЕ, Христијан Мицкоски му порача на премиерот Зоран Заев дека е негова лична работа ако сака да му помогне и да се грижи за семејството на Џезаир Шакири, попознат како Командант Хоџа, но не му дава за право да го вработува на висока функција во владата и да го плаќа со пари на граѓаните.

Двајцата делат иста идеологија и исти вредности. Но тука е важна и една друга порака. Се уште немаме одговор на прашањето кој го заробил, и кој го ослободил Танушевци, и зошто доколку било тоа така надлежните органи не реагирале и не ја известиле јавноста. И суштинската дилема останува, доколку некој се дрзне да направи некое незаконско дело, нападне полиција или нешто слично, наместо да биде санкциониран добива место во Владата. Ова е случај каде се рушат вредности, а преседанот станува правило, вели Мицкоски.

Тој предупреди дека е исклучително опасно ваков човек да биде поставен на така висока и чувствителна функција, бидејќи е на американската црна листа, а сега треба да добива информации кои се државна тајна и да советува околу безбедноста.

Го повикувам премиерот Зоран Заев да го раскине договорот за вработување на Џезаир Шакири во Владата и доколку толку многу сака да помогне можеби е добро да го вработи во неговата семејна компанија „Тотал инженеринг“. Убеден сум дека чесните граѓани на Македонија не би сакале да финансираат некој што се заканувал и велел дека доколку имал оружје, Македонците ќе ги протера од овие простори. Воедно предупредувам дека одговорност мора да се понесе, и не толку далеку од сега ќе мора да дадат одговори за ваквото деструктивно однесување, рече Мицкоски.

Доколку преземете содржина од оваа страница, во целост сте се согласиле со нејзините Услови за користење.