Македонија

Албанската Влада глува за барањата на македонското малцинство

Албанската Влада глува за барањата на македонското малцинство

Владата на Албанија на чело се премиерот Еди Рама остана глува на барањата намакедонското и грчкото малцинство кое живее во земјата во врска со новата административно – територијална поделба.

Без да се прифати ниту едно од барањата на малцинствата на денешната седница беше дадено зелено светло Парламентот да го усвои предлог – законот, а владиниот кабинет ја поддржа петтата варијанта, која пак претходно беше прифатена од Парламентарната комисија за територијална реформа.

Предлог законот е на дневен ред на седницата закажана за 23 јули, а треба да се изласа најдоцна до 31 јули кога е последната седница на парламентарнците пред летниот одмор.

Во меѓувреме, и преставникот на македонското малциство во Државниот комитет за малцинства во Албанија, Нико Китани, се произнесе против новата мапа на административно-територијална поделба, со која како самостојна локална единица останува само Пустец и го поддржа барањето на претставниците на македонската партија и нивните здруженија, општините во Голо Брдо и Гора да останат самостојни бидеќи таму живее голем дел на македонското малцинство.

Македонците во Албанија побараа во регионот на Пешкопеја, општините Стеблево, Требиште и Острени, областа на Голо Брдо да се обединат и да се создаде општина Голо Брдо. Во регионот на Кукс општините Шиштавец, Топојан и Запот во областа Гора да се обединат и да се создаде општина Гора, додека во регионот на Корча општина Пустец во областа на Преспа да се преименува во општина Преспа. Тие побараа помош и од меѓународните организации.

Против новата територијална поделба се и припадниците на грчкото малцинство, но и албанската опозициска Демократска партија, како и неколку пратеници од редовите на владеачките социјалисти. Доколку до последен миг останат на нивниот став владеачкото мнозинство ќе го нема потребниот број гласови (84) за да го изгласа истиот.