Уште најмалку пет лица се ослободени од авионот на „Иџиптер“, што утринава беше грабнат на линијата Александрија-Каиро и приземјен на аеродромот во Ларнака, на Кипар, јави Танјуг.
Пет лица, кои носеле униформи, се симнале од леталото, јавија кипарските медиуми од аеродромот во Ларнака.
Египетскиот министер за цивилна авијација соопшти дека во киднапираниот авион останале уште седум лица, меѓу кои тројца патници.
Претседателот на Кипар Никос Анастасиадис нагласи денеска дека „киднапирањето на авионот не соодветствува со чин на тероризам“, тука дека зад сето тоа стојат лични мотиви, пренесува „Блумберг“.
Претходно денеска, кипарскиот претседател имаше телефонски разговор со претседателот на Египет Абдел Фатах ал Сеси, јавува „Сајпрус мејл“.
Претпладнево речиси сите патници на киднапираниот авион беа ослободени додека во него останаа членовите на екипажот и неколкумина странци, соопшти авиокомпанијата „Иџиптер“, а медиумите наведоа дека патниците се ослободени по преговорите меѓу кипарските власти и грабнувачот.
Во авионот биле 55 патници и седум членови на екипажот, пренесоа медиумите, наведувајќи дека постои сомнеж дека во авионот е поставена бомба.
Аеродромот во Александрија, од каде авионот полета, денеска соопшти дека во авионот имало 30 Египќани, осум Американци, четворица британски државјани, двајца Белгијанци, четворица Холанѓани и еден италијански државјанин.
Египетските државни медиуми тврдат дека авионот е грабнат од египетскиот државјанин Ибрахим Самаха, на возраст од 27 или 28 години, а неговите мотиви засега се нејасни. Тој е вработен како професор по ветеринарна медицина на Универзитетот во Александрија.
Египетскиот амбасадор Мустафа Бакри на Твитер објави дека Самаха бара „политички азил“, пренесува британскиот весник „Индипендент“.
И египетското државно радио потврди дека грабнувачот побарал азил на Кипар, пренесуваат француските медиуми.
Кипарските медиуми тврдат и дека на Кипар живеела поранешната сопруга на киднаперот, но додека „Сајпрус мејл“ јавува дека тој побарал да разговара со неа, американската агенција „Блумберг“ тврди дека побарал да и се предаде негово писмо. Ваквите медиумски наводи, се уште, не се и официјално потврдени.
Во меѓувреме, Кипар го затвори за сообраќај аеродромот во Ларнака, јавија француските меидуми.
Киднаперот, наводно, на себе имал наредено појас со експлозив. „Гардијан“ цитира неименуван функционер од кипарското Министерство за надворешни работи кој изјавил: Тој не е терорист, тој е идиот. Друг функционер од кипарската Влада изјави : По се изгледа киднаперот е вљубен.
