Како дополнителен заменик министер во МВР, барам од техничкиот министер Оливер Спасовски веднаш да поднесе неотповиклива оставка од неговата позиција, истакна денес Оливер Андонов.
-Ова го барам од следните причини: Спасовски манипулира со македонската јавност, лаже за настани во МВР и изнесува невистини. Спасовски континуирани ги крши законите и правилата за работа во МВР, спроведувајќи самоволие. Тој креира криминално-полициска местенка заради политичка, општествена и лична дисквалификација на владини функционери и функционери на ВМРО-ДПМНЕ. Не случајно во нашиот ТВ дуел го нареков Спасовски-Заев бидејќи се потврдува дека тој е само бледа копија на неговиот партиски шеф, со единствена цел, дејствувајќи на ист принцип да ја спроведува деструктивната политика на СДСМ во насока на континуирано уривање на нормалното функционирање на МВР, рече Андонов.
Дополнителниот заменик министер обвинува дека Спасовски заедно со дел од неговите членови на кабинетот за кои се водат кривични постапки, се обидуваат да ја манипулираат македонската јавност бесрамно лажејќи за искреирани настани.
-И во овој период на предизборие, Спасовски креирајќи ја политиката на СДСМ со непрофесионално, криминално, насилно и деструктивно однесување, продолжува со кршење на законите, особено оние кои се поврзани со изборите и шро е спротивно на духот на пржинскиот договор и Законот за привремена Влада за спроведување на изборите. Ова ја потврдува тенденцијата на Спасовски, МВР да го употреби како инструмент за остварување на политичките цели на СДСМ за изборите, вели Андонов.
