Преземавме бројни активности за подобрување на администрацијата, не само од аспект на вработените туку и од аспект на процесите, истакна министерката за информатичко општество и администрација, Марта Арсовска Томовска.
„Во администрацијата е воспоставен систем. Направивме напори за подобрување на администрацијата, а резултатите ќе се видат многу брзо, сепак, процесот на реформите не може да се види преку ноќ. Преземавме бројни активности, не само во однос на самиот капацитет на вработените, не само во начинот на селекцијата, повисоките критериуми, не само од аспект на вработените, туку и од аспект на процесите. Се донесе нов закон за општоуправна постапка, сите административни процедури се скратија, се направи чистка на документи и докази кои се непотребни, се воспостави едношалтерски систем, имаме нови проекти кои ќе бидат реализирани со цел граѓаните да не губат време од шалтер на шалтер, туку сето тоа да биде многу побрзо и многу поефикасно“, истакна Арсовска Томовска.
Министерката за информатичко општество и јавна администрација гостуваше во „Отвореното студио“ на ТВ Нова со Билјана Василева Трендафилова. Поканет беше и дополнителниот заменик министер Александар Кирацоски кој ја одби поканата, поради како што рече, учество на ТВ дебати во други телевизии, согласно неговиот распоред.
„Дефинитивно градиме стручна администрација, администрација во којашто секој е вработен врз база на своие квалификации“, истакна министерката за информатичко општество и јавна администрација Марта Арсовска Томовска и додаде дека стручноста и компетентноста се неопходни за да се работи на оваа позиција.
Тие што ќе се вработат треба да продолжат откако ќе бидат вработени да ја вршат својата работа компетентно, затоа неопходна е да ги исполнуваат условите определени за работното место “, смета Арсовска Томовска.
Во врска со обвинувањата дека администрацијата е преполна со административци, министерката ги негираше ваквите тврдења истакнувајќи дека истите се базираат врз неточни податоци.
„Опозицијата од ракав вади бројки за вработеноста во администрацијата“, објасни Арсовска Томовска и додаде дека е клучно да бидат вработени најдобрите и најквалитетните кои брзо и ефикасно ќе ги услужат граѓаните.