Македонија

Бакрачески на терен, се санираат штетите по обилните врнежи

Бакрачески на терен, се санираат штетите по обилните врнежи

Градоначалникот на Охрид , Никола Бакрачески  од рано утрово е на терен  со цел да  утврди   со какви последици  се соочуваат охриѓани и мештаните од приградските населби по  дводневното невреме проследено со обилни врнежи од дожд и снег што го зафатија охридскиот  регион.

Како што соопштуваат од општина Охрид, по дојава од Кризниот штаб, градоначалникот заедно со својот тим  на лице  место ги констатира последиците од  поплавените предели  во населбата Даљан на улица „Сатеска“, на пресекот на улиците „Дејан Војвода“ и „Стив Наумов“ и на ул. „Аџи Мустафа“ во населбата Воска.

По извршениот увид, по налог на Градоначалникот, стручните  екипи од општина Охрид ,  добија задолжение дополнително да обезбедат  пумпи со цел полесно да се излева   навлезената вода од домовите.

Освен првичната техничка помош која што на лице место  ја добија  граѓаните од оштетените домови, градоначалникот вети и исплата на оштета од предизвиканата штета на загрозените семејства, за чија цел уште утре, 2-ри февруари,  ќе биде формирана и посебна комисија при општина Охрид.

Градоначалникот Бакрачески, и стручните служби на општина Охрид во корелација со   Кризниот штаб  и наредниве денови  будно  ќе ја следат ново настанатата ситуација со поплавите на територијата на општина Охрид, предизвикани   од повисокиот водостој   на реките, каналите и канализациската мрежа.

Инаку во  текот на ноќта екипи на ЈП “Охридски комуналец“ со целокупната механизација  и работен  потенцијал активно работеа на  чистење на снегот од улиците и тротоарите низ Охрид, додека  екипи на ЈП “Водовод“ и ЈП “Нискоградба“ со својата механизација  вршеа чистење на каналите и реките низ Општината.