Здружението на бранители „Бедем“ изразува поддршка на граѓанската иницијатива, иницирана од ГДОМ, за поддршка на македонската полиција.
Членовите на „Бедем“, како што соопштија, ќе присуствуваат на мирољубивите и мирни собири на плоштадите во 23 града во државата кои ќе се одржат во знак на благодарност за храброста и пожртвуваноста на хероите од македонската полиција.
– Припадниците на полицијата се луѓето кои ги ризикуваат своите животи во одбрана на нашата татковина и обезбедување соживот, мир и толеранција. Полицијата е пример кој треба да биде следен, како граѓани од сите националности се обединети во една цел и функција, обезбедување мир и одбрана на својата држава, стои во соопштението од „Бедем“ и се поздравува антитерористичката акција на полицијата која, се подвлекува, беше спроведена максимално професионално запазувајќи ги сите стандарди на акции од таков вид.
„Бедем“ ги повикува своите членови и сите почитувачи на бранителите да излезат на плоштадите во 23 града со почеток во 19 часот и да ја дадат својата поддршка на македонската полиција.
