Свет

Белата куќа ја преразгледува стратегијата за борба против ИД

Белата куќа ја преразгледува стратегијата за борба против ИД

Белата куќа ќе разгледува нови начини на кои коалицијата од западните земји, може да и помогне на ирачката армија да ја победи терористичката групација Исламска држава, изјави портпаролот на Белата куќа, Џош Ернест, пренесе МИА.

– Претседателот донесе указ со кој неговиот тим има задача да ја анализира досегашната стратегија, да измени и да оптимизира некои нејзини делови врз основа на досегашните искуства. Треба да се искористат најдобрите искуства и да бидеме умерени во тоа, да сториме се што е можно за напредок во борбата против ИД, рече Ернест.

Ернест додаде дека и натаму дел од американската стратегија се помошта, снабдувањето и консултациите на ирачките вооружени сили.

Официјалниот претставник на Стејт департментот Џон Кирби претходно вчера изјави дека за конечна победа на ИД во Ирак и за нејзино протерување од ирачката територија можеби се потребни најмалку пет години.

Ернест не даде конкретни рокови, но нагласи дека „тоа ќе биде долг процес“.