Белгиските власти обвинија уште двајца мажи за терористички активности во врска со изнајмување објекти за кои се смета дека биле користени како „сигурни куќи“ на терористи пред извршените напади минатиот месец во Брисел, соопшти денеска белгиското обвинителство.
– Тие се обвинети за учество во активности на терористичка група, терористички убиства и обиди за терористички убиства, како извршител или соучесник, истакна обвинителството.
Полицијата во саботата изврши акција во сомнителната „сигурна куќа“ во бриселскиот кварт Етербек, но не пронајде оружје, ниту експлозив.
Белгиски медиуми објавија дека двајцата обвинети биле забележани на видео снимка од безбедносни камери како влегуваат во оваа куќа еден ден по нападите во Брисел и од неа изнесуваат неколку торби.
Вкупно шестмина осомничени се уапсени и обвинети од крајот на минатата недела, па досега, како резултат на истрагата која ја спроведуваат белгиските власти од бомбашките напади на 22 март во Брисел, во кои загинаа 32 лица.
