Британските универзитети, вклучително и најстариот Оксфорд, ги отвора вратите за професорите кои бегаат од војна.
Хуманитарната организација Цара – Совет за професори од ризични земји (Council for At-risk Academics – Cara) се обидува да им помогне на научниците да заминат од Сирија. Цара работи со 38 факултети на Оксфорд и со повеќе од 100 други британски универзитети за да им овозможат пристап на научниците кои бегаат од војната и бараат нова работа, изјави извршниот директор на организацијата Стивен Вордсварт, пренесува МИА.
Околу две-третини од 140 студенти од Блискиот Исток, кои бараат помош во Цара во моментот се Сиријци, а поголемиот број од останатите се Ирачани. Научниците кои пристигнале во Велика Британија не сакаат да им биде откриен идентитетот за да ги заштитат семејствата во татковината.
Научниците кои ќе пристигнат во Велика Британија ќе имаат статус на визитинг-професор, а не на бегалци, а нивните трошоци ќе ги поделат универзитетот домаќин и Цара.