Спорт

Брумен нема да игра за Македонија на СП во Катар во 2015

Брумен нема да игра за Македонија на СП во Катар во 2015

Претседателот на Ракометната федерација на Македонија Живко Мукаетов во интервју за спортскиот портал „Екипа“ вели дека ракометарот на Вардар Матијаж Брумен не е во плановите за СП во Катар.

Веќе одамна се шпекулира дека десното крило на Вардар Матијаж Брумен би можел да добие македонски пасош и да биде дел од македонската репрезентација на СП во Катар. Сепак, претседателот на РФМ Живко Мукаетов ги демантира овие шпекулации.

-Матијаж Брумен е извонреден играч од светска класа, но не е во нашите планови за СП во Катар, истакнува во интервјуто за „Екипа“ претседателот на РФМ.

Мукаетов воедно се осврна на последниот меч на Македонија против Чешка и истакна дека е воодушевен од начинот на кој капитенот Кирил Лазаров ги предводеше соиграчите до големиот бод на тешкото гостување.

– Воодушевен сум од капитенот Кирил Лазаров кој особено на овој меч покажа што значи вистинско лидерство и го крена тимот кога тоа беше најпотребно. Горди сме што во нашите редови имаме не само репрезентативец од светски калибар туку и извонреден мотиватор. Извонреден беше и Борко Ристовски кој публиката во Злин и целата македонска ракометна јавност ја почести со своето маестрално роденденско издание. Да не ги заборавиме и Филип Миркуловски и останатите носители на репрезентативниот дрес кои уште еднаш покажаа како треба да се бориме со сите сили и со цело срце за достојно да ги претставиме боите на Македонија, вели првиот човек на РФМ.