Честитка од Иванов до новоизбраниот претседател на Бугарија

Претседателот на Република Македонија Ѓорге Иванов упати честитка до Румен Радев по повод изборот за нов претседател на Република Бугарија, соопшти кабинетот на македонскиот престедател.

– Дозволете ми во мое име и во име на граѓаните на Република Македонија да Ви упатам искрени честитки за победата на претседателските избори. Ви посакувам многу успех во извршувањето на одговорната функција. Република Македонија и Република Бугарија споделуваат многу нешта од минатото, но уште позначајно, имаме идентична визија за сегашноста и иднината, како и идентични предизвици, стои во честитката.

Стабилноста, безбедноста, економскиот просперитет на нашите држави и на регионот, посочува Иванов, е визијата која ја споделуваме.

Иванов истакнува дека таа визија ќе биде реалност само преку искрена посветеност во градењето добрососедски односи, максимална соработка на билатерален и на регионален план, забрзана интеграција на целиот регион во евроатлантските структури.

– Со таков пристап ќе можеме и посоодветно да се соочуваме со предизвиците. Република Бугарија има значајна улога на тој план. Сакам да Ве уверам дека целосно сум подготвен да работам со Вас на остварување на оваа визија. Верувам дека можеме со заеднички ангажман да дадеме личен придонес и очекувам и се надевам на тесна соработка и искрен дијалог. Во очекување на наша скорешна средба, примете ги изразите на моето највисоко почитување, се вели во честитката на македонскиот претседател Ѓорге Иванов до новизбраниот претседател на Бугарија Румен Радев.

Доколку преземете содржина од оваа страница, во целост сте се согласиле со нејзините Услови за користење.