Македонија

Честитка од Вељаноски по повод Денот на сесловенските просветители

Честитка од Вељаноски по повод Денот на сесловенските просветители

Претседателот на Собранието на Република Македонија Трајко Вељаноски упати честитка по повод Денот на сесловенските просветители светите Кирил и Методиј.

– Светите браќа Кирил и Методиј и нивното епохално и цивилизациско дело се придонес за македонскиот народ и за народите кои ги негуваат словенските културни особености. Наша е гордоста што нашите предци благодарение на светите браќа Кирил и Методиј  добија можност на свој разбирлив јазик да ги примат и шират христијанските вредности, стои во честитиката.

Во неа претседателот на Собранието додава дека нивната посветеност кон преводот на библиските текстови ги отворија портите на нови знаења и сеопшт развој на многу народи низ Европа и пошироко.

– Слободно, се додава, можеме да истакнеме дека огромна е и привилегијата што макотрпната работа и испирација за своите големи мисионерски походи ги црпеле токму од ова тло и од светилиштата во Македонија.

Во честитката се додава дека тие зад себе оставија и ученици, а меѓу најистакнатите се свети Климент и свети Наум, кои го создадоа Охридскиот универзитет еден од најстарите во Европа и паметник кој неможе да се избрише.

– Наша обврска е да создаваме трајни вредности, да го чуваме идентитетот, културата и јазикот. Убеден сум дека и идните генерации својот напредок ќе го темелат врз претходните и ќе ги спроведуваат светлите принципи на верба, истрајност и трудољубивост, наведува во честитката претседателот на Собранието на Република Македонија Трајко Вељаноски.