Црна Гора забрани увоз на стока со потекло од Крим или Севастопољ

Црна Гора забрани увоз на стока со потекло од Крим или Севастопољ
Црна Гора забрани увоз на стока со потекло од Крим или Севастопољ

Црногорската Влада усвои одлука за воведување на меѓународни рестриктивни мерки утврдени со одлуките на Советот на ЕУ, со која се забранува увоз и извоз од Крим и Севастопољ.

Мерките, како што се наведува во соопштението по владината седница, се одговор на незаконската анексија на Крим и Севастопољ.

Се забранува увоз во Црна Гора на стока со потекло од Крим или Севастопољ. Се забранува, директно или индиректно, односно давање финансиска помош, осигурувања и реосигурувања, во врска со увозот на стока со потекло од Крим или од Севастопољ. Забрането е свесно и намерно учествување во активности, чија цел или последица е непочитување на забраните, се наведува во одлуката, објаснувајќи дека мерките не важат за стока со потекло од Крим или Севестопољ која е дадена на преглед на украинските тела и за кои Владата на Украина издала потврда за потекло.

Црногорскиот весник „Побједа“ пишува дека е забрането и стекнување недвижности на полуостровот, како и сопственички хартии од вредност.

Во одлуката се додава и дека е забранета продажба, снабдување, пренос или извоз на стока и технологија од црногорски државјани или од територијата на Црна Гора, како и користење на пловни објекти или авиони под знамето на Црна Гора.

Доколку преземете содржина од оваа страница, во целост сте се согласиле со нејзините Услови за користење.