Цветков: Со изградбата на вештачки брани ќе се реши проблемот со поплавите

За долгорочно решавање на проблемот со поплавите продолжува изградбата на вештачки акумулации, истакна денеска министерот за земјоделство, шумарство и водостопанство Михаил Цветков.

– Со тековното чистење на каналите и речните корита, како и со изградба на вештачки брани донекаде ќе се регулираат штетите од поплавите. Сепак, мора да бидеме реални, станува збор за природна појава која поради климатските промени во иднина ќе биде и почеста, истакна министерот.

Според него, моментно се работи на браните на Оризарска и Коњска Река.

Во врска со состојбата во сточарството, Цветков подвлече дека нема драстично намалување на добиточниот фонд, а клучен фактор за развој на оваа гранка е секако производството на домашна сточна храна.

– Не можеме да очекуваме зголемување на добиточниот фонд ако не се работи на основата – зголемување на домашното производство на сточна храна, рече Цветков.

Како што додаде, доколку со современи системи за наводнување „капка по капка“ бидат опфатени 7.000 хектари пченка, за седум години може во целост да се регулира извозот на добиточна храна, што за Македонија би значело годишна заштеда на 20 милиони долари.

Доколку преземете содржина од оваа страница, во целост сте се согласиле со нејзините Услови за користење.