Новата влада се надева на брз влез во НАТО под референцата БЈРМ, Грција мисли дека полесно ќе го реши проблемот со името со СДСМ, изјави професорот Александар Даштевски во емисијата „Само вистина“ на Канал 5 и потсети дека Македонија не влезе во НАТО во 2008 година на самитот во Букурешт поради проблемот со името.
Ова го потврди и неговиот соговорник Шпетим Љатифи кој изјави дека државата сите услови за влез во НАТО ги исполнила уште во 2008 година.
Според Даштевски новата влада се надева на брз влез во НАТО под референцата БЈРМ. Истото решение беше понудено од Владата на ВМРО-ДПМНЕ во 2008 година и тогаш не беше прифатено од Грција. Тогаш Грција радикално ги промени своите ставови и бараше во решението воопшто да го нема зборот Македонија.
Рече дека политичарите во Грција добиваат политички поени на два одредени проблема. „Број еден проблем во Грција е решавање на економската криза, а проблем број два е решавање на спорот со името“, прецизираше Даштевски.
Според него во 2008 година грчката влада во очекување на економската криза и немање на решение за неа купувала политички поени на блокирање на евроатланските интеграции на Република Македонија. Ставањето вето на членството на Македонија во НАТО го продолжи векот на владата на Папандреу.
Даштевски изјави дека Македонија е стратешки битна за НАТО бидејќи кој ја контролира Моравско-Вардарска долина го контролира Балканот. Поради тоа брз прием на Македонија во НАТО е исклучително важен. Грција мисли дека полесно ќе го реши проблемот со името со новата влада предводена од СДСМ.
https://www.youtube.com/watch?v=-vCkliZiEVo
