Ракометарите на Металург, кои изминатиов период ги раскинаа договорите со клубот полека почнуваат да пронаоѓаат ангажмани во странство.
По Филип Миркуловски, кој кариерата ќе ја продолжи во Хановер, и Дејан Манасков се сели во Бундес лигата, односно во тимот на Вецлар. Тој во тимот ќе им се придружи на поранешниот соиграч Владан Липовина и хрватската ракометна легенда Ивано Балиќ.
Задоволството од ангажманот на Манасков не го криеше ниту извршниот директор на Вецлар, Бјорн Зајп, кој нагласи дека добива млад, а сепак искусен ракометар.
“По повредата на вкрстените лигаменти на Максимилијан Холст, остана дупка на левата крилна позиција. Можноста да се засилиме со Манасков ни се виде одлична и затоа брзо реагиравме. Пресреќни сме што успеавме да го донесеме бидејќи се работи за искусен ракометар иако има само 22 години. Утре го очекуваме на медицински прегледи и потоа треба да се приклучи на тимот”, изјави Зајп.
Сепак останува отворено прашањето дали Манасков ќе остане во тимот и по завршувањето на сезоната или ова е само привремено решение и за нашиот ракометар и за тимот на Вецлар.
