ДУИ прогласи победа, оцени дека изборите минале во мирна, фер и демократска атмосфера

Локалните избори поминаа во мирна, фер и демократска атмосфера, а граѓаните докажаа дека се за НАТО, ЕУ и за силни и развиени општини, истакна на прес-конференцијата портпаролот на Централниот изборен штаб на ДУИ, Арбер Адеми во партиското седиште во Тетово.

„ДУИ смета дека денешните локални избори поминаа во мирна, фер, коректна и демократска атмосфера. Граѓаните докажаа дека се за НАТО и ЕУ, како и за силни и развиени општини. Сите учесници во денешниот изборен процес го дадоа својот придонес тој да биде изведен според европските стандарди“, рече Адеми.

Упати благодарност до активистите и раководството на партијата за, како што рече,
победата во општините каде што има свои кандидати и особено го истакна придонесот на илјадниците сограѓани кои дошле од дијаспората на денешниот изборен ден во Кичево и на други места зашто има значајна тежина.

Според процените на Централниот изборен штаб на ДУИ, тие се најголеми фаворити за
убедлива победа секаде каде што имаат свои кандидати за овие локални избори.

Доколку преземете содржина од оваа страница, во целост сте се согласиле со нејзините Услови за користење.