Новите законски измени за зголемување на минималната плата како и измените на законот за стечајци добија позитивно мислење и поддршка од партнерите на Економско-социјалниот совет.
„Направивме дополнители консултации со организациите на работодавачи и репрезентативните синдикати во насока на давање нивна согласност и позитивно мислење за изменувањето на Законот за материјално обезбедување невработени лица по основ на приватизација на претпријатија во доминантна сопственост на државата и изменување и дополнување на Законот за минимална плата. И работодавачите и синдикатите дадоа позитивно мислење и официјален став за прифаќање на овие предлог измени и очекуваме тие набрзо да бидат разгледани и прифатени“, рече министерот за труд и социјална политика Диме Спасов по седницата на Советот.
Тој нагласи дека со измените на законот за стечај, наместо до 2004 година ќе бидат опфатени сите вработени кои останале без работа по основ на стечај, ликвидација и технолошки вишок во претпријатија во доминантна државна сосптвеност до 31 декември 2013 година.
„Очекуваме условите во законот да ги исполнат 3.000 невработени лица, со што би добиле околу 7.100 денари месечно и здравствено осигурување дополнително се до нивното следно вработување или стекнување услови за пензија“, рече Спасов.
Во врска со зголемување на минималната плата, Спасов смета дека тоа е клучен проект во зголемување на минималната плата која за три години треба да достигне 10.080 денари.
„Со измените и дополнувањата на овој закон се опфаќа една поголема група граѓани во земјата, односно околу 65.000 вработени во приватниот сектор кои во моментов земаат минимална плата и кои со овие измени предвидуваме и очекуваме подобрување на животниот стандард на овие трудољубиви работници кои го даваат максимумот во насока на обезбедување егзистенција“, рече министерот за труд и социјална политика.
