Поради злоупотреба на службената должност поранешниот директор на Царинската управа, Ванчо Каргов е осуден на три месеци условна затворска казна, која нема да се изврши доколку тој не стори прекршок во наредните година и пол по правосилноста на пресудата.
Според пресудата Каргов е осуден поради злоупотреба на службената должност, односно додека бил директор на Царинска управа, не го почитувал решението на Комисијата за работни односи, и одбил да го врати на работа Ласте Ивановски, кој претходно бил избркан поради кршење на работниот ред и дисциплина, стои во образложението од судот.
Колку за потсетување, и 42 годишниот скопјанец, Ивановски, во април оваа година, заработи кривична пријава бидејќи му се заканувал на поранешниот директор на Царинската управа Ванчо Каргов.
Од полицијата тогаш информираа дека пред една недела Ивановски отишол пред влезот од зградата каде што живее Каргов, кој сега е претседател на инспекциски служби во Владата и неконтролирано викал и ѕвонел по влезните врати, а по пријава на настанот во полиција на пријавениот му е издаден платен налог за сторен прекршок од ЗППЈРМ.
Три дена подоцна скопјанецот под дејство на алкохол повторно отишол пред влезната врата од станот на Каргов притоа вербално заканувајќи се дека ќе го убие.
Причина за заканите била отказ кој Л.И. го добил во 2009 година во време кога Каргов бил директор во Царинската управа.