Смртните пресуди изречени на соборениот египетски претседател Мохамед Морси и лидерите на Муслиманско братство претставуваат масакр на законот и основните права, изјави денеска турскиот претседател Реџеп Тајип Ердоган, обајви МИА.
– Повикувам меѓународната заедница да делува со цел да се поништат овие пресуди, донесени врз основа на инструкции од режимот, како и да се спречи овој пат што може сериозно да го загрози мирот во египетското општество, се наведува во соопштението на Ердоган.
Египетскиот суд го осуди Морси на смртна казна, во процес во кој е обвинет за масовни бегства од затвор и напади на полицијата во текот на бунтот против тогашниот претседател Хосни Мубарак во 2011 година. Судот врз основа на овие обвиненија во мај бараше смртна казна за Морси, но тоа барање беше дадено на разгледување на муфтија, кој е врховен толкувач на исламскиот закон во Египет.