ЕУ бара Фронтекс да и помогне на Македонија

Германскиот весник „Билд ам Зонтаг“ пишува дека Европската унија ќе побара Европската гранична агенција – Фронтекс да отвори канцеларија во Македонија, со цел да и помогне на земјава да ја контролира границата со Грција.

Тоа е одговор на Европската унија на иницијативата на словенечкиот премиер Миро Церар за зајакнување на поддршката за Македонија за контрола на границата со Грција, за која денеска на неформален состанок во Амстердам ќе разговараат министрите за внатрешни работи и за правда на земјите членки на Унијата.

Во моментов Фронтекс има право да делува само на територијата на Европската унија. ЕК планира на најбрз начин да создаде правна основа за работата на Фронтекс во Македонија.

Европската комисија веќе и додели на Македонија 2,6 милиони евра во форма на хуманитарна помош, а се очекува да добие и дополнителни финансиски средства и помош во опрема и персонал. Македонија е дел од т.н. западнобалканска рута по која мигрантите се упатуваат на патот кон ЕУ.

Се оценува дека земјата најмногу настрада од делувањето на соседна Грција чии власти организирано испратија во Македонија, а оттаму и во Европската унија стотици илјади мигранти. Грција која граничи со Македонија многупати беше обвинувана дека не ја заштитува својата надворешна граница која исто така е надворешна граница на Европската унија.

Доколку преземете содржина од оваа страница, во целост сте се согласиле со нејзините Услови за користење.