ЕВН Македонија на сопствен трошок ја санира мрежата во поплавените подрачја

По информациите кои се појавија на социјалните мрежи дека ЕВН Македонија им наплатувале за приклучок на жителите од поплавените подрачја, Курир го контактираше портпаролот Атанас Ковачевски кој ваквите пишувања најостро ги демантира.

-Во интерес на правилно и точно информирање, сакаме да потенцираме дека замената на броилата во поплавените подрачја и санацијата на мрежата се на товар на ЕВН Македонија и ниту еден корисник од овие региони не платил за оваа услуга. Оттука, категорично ги демантираме сите невистини што се јавија на социјалните мрежи во кои се тврди спротивното. Екипите на ЕВН Македонија со сите расположливи капацитети работат на терен за што побрзо да се санираат штетите и да се обезбеди електрична енергија до сите корисници. ЕВН Македонија не само што не ги наплатува новите броила, туку во интерес на безбедно и навремено снабдување со електрична енергија нашите екипи ја санираат и внатрешната инсталација на корисниците, повторно без никаков надомест, вели Ковачевски за Курир.

Тој додава дека споделувањето на непроверени информации заради лични интереси и лично промовирање во услови на елементарна непогода, не му помага никому.

-Сега е време во кое треба сите да работат на санирање на штетите од невремето. Екипите на ЕВН Македонија од почетокот на кризата се во поплавените подрачја и постојано работат на отстранување  на дефектите и пуштање под наопон на што поголем број корисници. Досега се вклучени над 13.000 корисници, односно над 95% од вкупниот број на корисници во критичниот регион и интензивно се работи да се приклучат сите. Без напојување во моментов се неколку стотици корисници кои се напојуваат од трафостаници кои се под вода и корсниците кои не сакаат да бидат приклучени поради уништената внатрешна инсталација. Екипите остануваат на терен сè додека не се нормализира во целост снабдувањето со електрична енергија, информира Ковачевски.

Доколку преземете содржина од оваа страница, во целост сте се согласиле со нејзините Услови за користење.