Спорт

Федерер се откажа, Ѓоковиќ без борба до титулата во Лондон

Федерер се откажа, Ѓоковиќ без борба до титулата во Лондон

Спектаклот во Лондон кој сите го очекуваа изостана. Рожер Федерер поради болки во грбот беше приморан да се повлече од финалето на завршниот Мастерс годинава, и со тоа без борба да му ја препушти титулата на Новак Ѓоковиќ.

Мечот беше закажан за 19 часот, но пред да започне почетокот Федерер се појави во арената “О2” и го откажа своето учество во финалето. Тој нагласи дека пробал се што може за да биде способен за игра меѓутоа болките не прекинувале, па единствено што му останало е да го откаже настапот во финалето.

И светскиот рекет број еден, Србинот Новак Ѓоковиќ истакна дека иако е среќен што повторно ја освои титулата во Лондон, не сакал тоа да го стори на ваков начин.

“Нормално дека ова не е начинот на кој сакав да го освојам трофејот. Секако дека тоа не го сакаше ни Рожер бидејќи верувам дека доколку беше подготвен, ќе излезеше на терен” – изјави Ѓоковиќ.

Српскиот тенисер додаде дека му е жал и за публиката во арената „О2“.

“Ова требаше да биде финале на најдобрите двајца тенисери во светот, првпат нема да биде одиграно и многу ми е жал поради тоа. Јас имав многу успешна сезона, овде веќе три години сум непоразен. Ова ја круниса сезоната, јас и мојот тим сме задоволни од тоа што го постигнавме” – вели Ѓоковиќ.