Дисциплинската комисија при Светската фудбалска организација (ФИФА), потврди дека покрена постапка против репрезентативецот на Уругвај, Луис Суарез, кој на дуелот против репрезентацијата на Италија, намерно за рамо го гризна дефанзивецот на “азурите”, Џорџо Киелини, но таквиот срамен потег намерно или немамерно не беше казнет од мексиканскиот судија, Марко Родригез.
„ФИФА може да потврди дека е покрената дисциплинска постапка против репрезентативецот на Уругвај, Луис Суарез. Фудбалерот и Фудбалската федерација на Уругвај имаа рок до 17:00 часот да ги презентираат своите докази”, стои во официјалното соопштение на ФИФА.
Гризењето на противничкиот фудбалер не е нешто ново за напаѓачот на Ливерпул. Пред неколку сезони Суарез го гризна фудбалерот на ПСВ, а пред две години, уругвајскиот интернационалец го гризна и репрезентативецот на Србија, Бранислав Ивановиќ и заработи суспензија од десет натпревари.
Контроверзниот напаѓач сега може да заработи казна од 24 натпревари или забрана за настап во следните 2 години.