Филипче најави дека уште седмицава во собраниска процедура ќе влезе Законот за лекови

Во текот на оваа седмица по завршните консултации со правниците, Законот за лекови и медицински средства ќе биде вратен во собраниска процедура на прво читање, истакна во понеделникот министерот за здравство Венко Филипче, додавајќи дека ќе следи и јавна расправа за да се образложат деталите за промените кои ги направиле.

Одговарајќи на новинарско прашање по регионалната консултативна средба за обезбедување одржливотст на сервисите за ХИВ и туберкулоза, Филипче рече дека до крајот на оваа недела или на почетокот на следната недела планираат состанок во Владата, заедно со премиерот за да ја донесат дефинитивната одлука за изградба на нов Клинички центар.

„Имаме закажано состанок со архитектите. Во документацијата која ја проверив наидов на анализа од Архитектонскиот факултет врз основа на која е направен овој проект“, рече Филипче.

Во врска со случајот со родилката од Кичево која почина за време на породување во приватна болница, истакна дека во текот на минатата недела пристигнале извештаите и од Комисијата која ја формирале во Министерството за здравство да го испита случајот и околностите во кои тој се случил, како и извештајот од Институтот за судска медицина од обдукцискиот наод на пациентката.

„Направив дополнителни консултации и со тимот од Институтот за судска медицина и со членовите на Комисијата која ја формиравме во Министерството. Во текот на денешниот ден ќе излеземе со официјално соопштение и став од Министерството, а во однос на обдукцискиот наод не би коментирал ништо пнатаму поради тоа што тој е предаден во Основното јавно обвинителство и е предмет на истрага’, додаде Филипче.

 

Доколку преземете содржина од оваа страница, во целост сте се согласиле со нејзините Услови за користење.