Магазин

Филмот „Борци“ го отвора Францускиот филмски фестивал

Филмот „Борци“ го отвора Францускиот филмски фестивал

Со филмот „Борци“ (2014) на режисерот Тома Каје, утре во кино „Милениум“, во ГТЦ ќе се отвори осмиот по ред француски филмски фестивал.

Овој фестивал се одржува во организација на Францускиот институт во Скопје, а со поддршка на Министерството за култура на Македонија, Регионот на Долна Нормандија, Охридска банка-Сосиете Женерал, Публицис, оркестарот F.A.M.E.S, Младинскиот културен центар, Кинотеката на Македонија, Националната агенција за филм, Публицис, Градот Охрид, Центарот за култура во Охрид и Пежо.

Фестивалот ќе трае до 20-ти јуни, а програмата, како и претходните неколку години ќе биде поделена во два града и тоа од 17-ти до 19-ти јуни во Скопје, а на 20-ти јуни свеченото затворање ќе се одржи во Охрид.

Предвидено е да се прикажат 8 долгометражни филма, а фестивалските денови ќе бидат свечено затворени во Охрид со проекција на филмот „Семејството Белие“(2014) филмско остварување на режисерот Ерик Лартиго.

И оваа година љубителите на седмата уметност ќе можат да ги погледнат најновите остварувања од француската кинематографија и да бидат дел од средбите и дискусиите со годинешните гости-учесници на филмските остварувања и тоа: Ањес Сорал (актерка), добитничка на почесната награда Златна маска на фестивалот, Дијан Руксел (актерка), Антоан Лоран (актер), Фред Корсјал (композитор), БрисДаволи (композитор), Одре Бијар, член на асооцијацијата ОФФ од Трувил и Ален Мајор (продуцент).

Осмото издание на овој веќе реномиран фестивал е со изменет и збогатен концепт, чија цел ќе биде професионалното претставување и поврзување на македонските и француските професионалци од филмската индустрија, како и нивно вмрежување за искористување на можностите од взаемната соработка. Посебен акцент ќе се стави годинава и на дигиталните уметности, и тоа на тема филм и аудиовизуелни уметности преку организирање на работилници за дигитални уметности со цел изработка на мини-видеа со мобилни телефони (во соработка со македонските асоцијации).

Францускиот филмски фестивал претставува престижна француско-македонска манифестација и е значајна за македонската кинематографија, бидејќи дава можност да се зацврстат темелите на идната соработка меѓу францускиот и македонскиот филм, да се отворат нови можности за размена на уметници, продуценти, режисери, размена на искуства со земја која претставува лидер во европската кинематографија.