Министерот за одбрана на Република Македонија, Зоран Јолевски и началникот на Генералштабот на Армијата на Република Македонија, генерал-потполковник Горанчо Котески, ја посетија изложбата на борбени средства, техника и опрема, поставена на Воениот стадион во Скопје.
„Тактичко-техничкиот збор е дел од активностите по повод Денот на АРМ, кој има цел да ги запознае граѓаните со средствата кои се во Армијата и се надеваме дека со вакви дружења ќе внесеме уште повеќе љубов на граѓаните на Република Македонија кон својата Армија“, истакна министерот Јолевски во оваа пригода.
Генералот Котески, пак, информираше дека оваа изложба е само дел од активностите кои се организираат по повод денот на АРМ и дека на изложбата граѓаните подетално ќе можат да се запознаат со борбените средства од одредени родови и служби, како оклопните единици, специјалните единици, логистиката и слично.
На новинарско прашање поврзано со статусот на опремата со која располагала АРМ и моменталната состојба, министерот Јолевски посочи дека денес, во споредба со состојбата на Армијата од пред две, па и една декада, направен е голем напредок. Ние, додаде министерот, мораме да продолжиме и понатаму да ја зајакнуваме АРМ и да обезбедуваме што е можно посовремена опрема со цел заштита на територијалниот интегритет и суверенитет на Република Македонија, односно АРМ да остане да биде гарант на мирот во Македонија. Дополнително, министерот Јолевски рече дека Македонија продолжува да биде дел од меѓународните мировни мисии и дека освен на НАТО, ние ќе се фокусираме и на идните мисии на Обединетите Нации.
Воедно, на прашањето поврзано со ребалансот на буџетот за оваа година, и импликациите врз Армијата, министерот Јолевски истакна дека во соработка со Генералштабот, изготвена е програма со која нема да има посериозни промени во зацртаните планови на Министерството и на Армијата.
