ФОТО: Прилепчани фатени на дело додека „оперирале“ во стан во Охрид

Прилепчаните К.Р.(44) и Д.М(43) заработија кривична пријава. Се товарат дека сториле дванаесет казнени дела „тешка кражба“, а на 21 мај годинава околу 12 часот, биле затекнати од полициски иснпектори додека „оперирале“ на блиндор врата во стан на петтиот кат на улицата „Мирче Ацев“ во Охрид.

Како што соопштува порталот Охрид њуз, при личен како и претрес во нивното патничко моторно возило, биле пронајдени инбус клучеви, мини метална округла шипка, една мини плосната шипка, една метална пинцета, два скалпери, еден француски клуч, еден штрафцигер и една зипер кесичка со пет пластични портокалови мунистри. Претходно, двајцата пријавени пристигнале во Охрид со патничко моторно возило „Хонда Акорд“ црна боја со бугарски регистарски таблици.

Пријавените биле посебно специјализирани за употреба на подесен алат за обивање на блиндор врати а кривичните дела ги сториле во Охрид од септември минатата до мај оваа година во периодот од 07 до 17 часот. Откако ќе sвонеле и затропале на становите каде ќе забележеле блиндор врати и ќе констатирале дека во станот нема никој, тие со вешто користење на алатите, ги разбивале блиндор вратите и успевале да влезат во становите.

Притоа вршеле пребарување и одземале пари сокриени во метални каси, во ташни, во плакари. Пронаоѓале и одземале златен накит со циркони  со жолто и бело злато, златни прстени, обетки и белегзии, златни и сребрени монети,  рачни вредни часовници од различни марки, сребрени ланци и Сваровски накит, венчален фустан. Покрај тоа, одземале пасоши и други лични и вредни семејни документи.

На овој начин, двајцата пријавени се стекнале со противправна имотна во вредност над 300.000 денари.

фото: Ohridnews

Доколку преземете содржина од оваа страница, во целост сте се согласиле со нејзините Услови за користење.