Доколку ви здодеа да лепите готови сликички на велигденските јајца или да ги шарате со најразлични ливчиња, тогаш можеби треба да пробате декупаж техника.
Ако не сте знаеле, декупаж е техника на украсување на предмети со салфети. Луѓето одат толку далеку што со салфети обложуваат делови од мебелот, но за тоа во друга прилика.
Ако сакате со оваа техника да ги декорирате велигденските јајца тогаш ќе ви биде потребно:
1 белка од јајце;
Трослојни салфети
Четка за боење
Варени јајца
Постапка:
Потребно е прво да ги сварите јајцата, а слободно може претходно да ги обоите.
Трослојните салфети одделете ги, затоа што ќе ви биде потребен само еден слој и тоа оној на кој имате слики.
Секоја слика што сакате да се најде на вашите јајца исечете ја со ножици и потрудете се тоа да го направите колку што можете попрецизно.
Потоа премачкајте го јајцето со белка на местото каде сакате да ја залепите сликата и на тоа место залепете ги сликите од салфетата.
Врз салфетката повторно премачкајте со белка, додека сосема не се залепи.
Потрудете се да не ги допирате јајцата додека сеуште не се изушени за да не ја поместите или скинете сликата.
Ставете го настрана да се исуши. Секоја неправилност што ќе ја забележите, ќе се изгуби откако јајцето ќе се исуши.
фото: Prva.rs