ФУЕН изгласа резолуција за правата на Македонците во Албанија

Федералната унија на европските националности (ФУЕН) на 62-от Конгрес што се одржува во Клуж-Напока во Романија едногласно усвои Резолуција за правата на Македонците во Република Албанија, предложена од македонското друштво „Илинден“ од Тирана.

133704943

„Нашето друштво, како официјален член на ФУЕН, го искористи правото да ја достави Резолуцијата до конгресот што се одржува во Клуж-Напока, Република Романија. За неа гласаа сите 300 делегати, претставници на 50 асоцијации на повеќе од триесет малцинства од исто толку земји во Европа“, изјави Никола Ѓурѓај, претседател на друштвото и учесник на конгресот.

Потсети дека ваков документ ФУЕН изгласува по вторпат. Првпат тоа се случи на конгресот одржан во мај минатата година во полскиот град Вроцлав.

Резолуцијата содржи седум точки со кои се бара Владата на Република Албанија да ја потпише и ратификува Европската повелба на Советот на Европа „за регионални и малцински јазици”, да се признае македонското национално малцинство во Голо Брдо, Гора и на целата територија на Република Албанија, државната телевизија (TVSh) да емитува програма на македонски јазик, како и да се учи на мајчин македонски јазик во државните школи во областа на Голо Брдо, Гора и на оние места каде живее значителен број припадници на македонската етничка заедница.

Во Резолуцијата се бара да се преиспита и административната поделба спроведена 2015 година, која според македонското малцинство во Албанија е чекор назад во почитувањето на правата на македонското малцинство во Голо Брдо и Гора. Се предлага и во сите општини каде живеат повеќе од 20 отсто Македонци, покрај албанскиот, официјален да биде и македонски јазик и да се обезбеди финансиска поддршка од Министерството за култура на Албанија за културни и од Министерството за образование и спорт за задоволување на образовните потреби на македонското национално малцинство.

ФУЕН оваа Резолуција ќе ја достави до Владата на Република Албанија и меѓународните институции.

Македонското друштво „Илинден” е рамноправен член на ФУЕН од мај 2015 година и е првото друштво на Македонци надвор од матичната држава, кое е рамноправен член со право на глас.

Доколку преземете содржина од оваа страница, во целост сте се согласиле со нејзините Услови за користење.