Германската компанија „Таурус фарм“ денеска почна со изградба на откупно дистрибутивен центар за овошје и зеленчук во Богданци. На поставување на камен-темелникот присуствуваше министерот за земјоделство, шумарство и водостопанство Михаил Цветков, пренесе МИА.
Цетков истакна дека Владата започна проект за инвестиции во откупно дистрибутивни центри кои треба да обезбедат полесен пласман на овошје и зеленчук преку примена на современи технологии на прием, селекција, калибрација и комори за складирање и дека поддршката се состои во обезбедување атрактивни локации и техничка поддршка во административни процедури.
– Министерството за земјоделство, шумарство и водостопанство понуди 27 можни локации за откупно дистрибутивни центри со површина од 1 до 17 хектари од кои веќе се продадени 11 локации во Богданци, Ресен, Гевгелија, Кочани, Облешево, Неготино, Штип, Врапчиште, Илинден и Пехчево, истакна Цветков и нагласи дека заради зголемен интерес од страна на потенцијални инвеститори во процедура за пренамена се уште четири локации во Валандово, Босилово, Струмица и Могила.
Министерот Цветков потенцира дека Владата и Министерството за земјоделство посветено работат на решавањето на предизвиците и потребите на земјоделците со определба да се поддржуваат сите инвестиции кои во крајна линија даваат бенефит за земјоделците.
Томас Шварц техничкиот дирекор на „Таурус Фарм“ рече дека ова е прва фаза од нивната соработка со овоштарите и градинарите од овој регион за кое истакна дека понатаму ќе се проширува и продлабочува на задоволство на двете страни.
Германската компанија на македонскиот пазар е присутна од 2012 година.