На спортскиот аеродром Стенковец, пред два дена се случил воздухопловен инцидент во кој била искршена една од цесните за обука на пилоти на аероклубот „Скопје“, пиштува дневниот весник „Вест“. Ученикот, кому ова му бил прв самостоен лет, бил ексдиректорот на Агенцијата за цивилно воздухопловство, Илир Мехмеди.
Информацијата ја потврди директорот на аероклубот „Скопје“, Дејан Саздов.
„При слетување, пилотот направил ученичка грешка. Цесната, на мала брзина, се преврте при слетување. Пилотот Мехмеди не е повреден, со него отидовме на лекарски преглед. Авионот, исто така, изгледа не е многу оштетен. Веќе е товарен на камион и испратен на сервис во Србија“, изјави Саздовски, додавајќи дека пилотот бил доволно искусен за да пилотира сам.
На самото место веднаш излгле инспектор на Агенцијата за цивилно воздухопловство и истражител на Комитетот за истраги на воздухопловни несреќи и сериозни инциденти.
„Ова бил прв самостоен лет на пилотот, по завршувањето на обуката. Имал проблеми при слетување на пистата на аредромот Стенковец. Ќе се истражи и утврди птичината за сериозниот инцидент и висината на штетата на цесната 172“, изјавија од Комитетот за истраги.
По процедурата, кога ќе се случи воздухоловен настан, контролата на летање повикува инспектор на Агенцијата за цивилно воздухопловство и истражител на Комитетот, а доколку има поголема штета или повредени лица тогаш бидејќи се работи за сериозен инцидент, истрагата за презема Комитетот.
Ниту портпаролот, ниту директорот на Агенцијата за цивилно воздухопловство вчера не беа достапни за изјава.
Пилотот на цесната, Илир Мехмеди е поранешен директор на Агенцијата за цивилно воздухопловство, а сега работи во оваа институција како раководител на сектор.
Од аероклубот „Скопје“ изјавија дека како што бара заканот, Мехмеди имал валидно лекарско уверение во своето досие.