Собранието на Република Македонија денеска ќе одржи продолжение на 49. седница на која на дневен ред се годишните извештаи за работата на Советот на јавните обвинители на Република Македонија и на Судскиот совет на Република Македонија за 2014 година.
Меѓу точките се и измените и дополнувањата на Законот за управување со конфискуван имот, имотна корист и одземени предмети во кривична и прекршочна постапка, на Законот за спречување на корупцијата, на Законот за воздухопловство и за Предлог законот за дополнување на Законот за продажба на земјоделското земјиште во државна сопственост, сите во прво читање.
Пратениците треба да го разгледаат и Предлог законот за изменување и дополнување на Законот за трговските друштва, по скратена постапка.
На дневен ред се и два закона за ратификации како и неколку барања за давање автентично толкување на членови од закони.