Премиерот Никола Груевски во вечерашното обраќање до нацијата истакна дека утре изутрина до претседателот на Собранието, Трајко Вељаноски ќе испрати писмо со најава за своето времено повлекување, кое ќе биде ефективно на сто дена пред датумот на изборите.
Тој рече дека земјава предолго е заглавена во политичката криза, притоа потсетувајќи дека четирите најголеми политички партии заедно со олеснувачите од меѓународната заедница летово склучија договор за нејзино надминување.
– Многу е важно да се остават проблемите зад нас, за да може народот и државата да продолжат напред, да се отворат нови работни места, да се градат училишта, инфраструктура, патишта, болници, субвенции, зголемување на плати, пензии, да продолжи силно растот на нашата економија. Сите партии потпишаа договор што треба да ја разреши и да ја заврши кризата. Ние направивме многу компромиси. Дури бевме и критикувани дека и премногу сме биле компромисни и премногу сме попуштале. Ние тоа го правевме свесно и за доброто на државата.
ВМРО-ДПМНЕ како партија ги исполни во целост своите обврски од договорот во Пржино. СДСМ доби двајца министри со ресор и три дополнителни заменици-министри, се одбра Специјален јавен обвинител со целосни услови за работа, беше одбран составот на ДИК каде опозицијата има доминација, секретар и претседател од своите редови. Изборниот законик е променет согласно барањата на опозицијата….
Изборите треба да се закажат за 24-ти април. Сега е време да се исполни оваа обврска. За жал, неодамнешните изјави од страна на СДСМ фрлаат сенка врз овој дел од договорот. Ова е јасна замка за да се држи нашата земја во заложништво, да се држи во криза, конфликтност и да се оспори правото на народот да ги одбира луѓето кои мисли дека треба да ја предводат државата. Јас сум против ова кочење и против ваквото држење на државата во заложништво, подвлече премиерот.
