Премиерот и лидер на ВМРО-ДПМНЕ Никола Груевски денеска и утре ќе учествува на 22-от конгрес на Европската народна партија (ЕПП), кој ќе се одржи во главниот град на Ирска, Даблин, информира МИА.
Во делегацијата која го придружува се и членовите на Извршниот комитет на ВМРО-ДПМНЕ Мартин Протоѓер, Влатко Ѓорчев и Никола Попоски, кој е и актуелен шеф на македонската дипломатија.
Конгресот претставува подготовка и е вовед во изборите за Европскиот парламент што ќе се одржат од 22-25 мај, настан кој ќе ја одбележи оваа 2014 година во ЕУ. На конгресот на Европската народна партија ќе се избере и нејзин кандидат за претседател на Европската комисија.
Според аналитичарите, изборот, кој ќе го направи Европската народна партија, за многумина е одлучувачки бидејќи согласно доминантната поддршка, која ја има оваа партија во рамките на земјите на ЕУ, многу веројатно тоа ќе биде и новиот наследник на Жозе Мануел Баросо и иден претседател на Европската комисија.
На денешната пленарна сесија на Конкресот има повеќе точки на дневниот ред меѓу кои и избор на претседател на ЕПП, дискусија и гласање за Акциската програма 2014-2019 по што ќе следи гласање за повеќе резолуции и декларации.
За попладнево предвидени се обраќања пред присутните на повеќе шефови на држави и влади, меѓу кои и на премиерот Груевски, кој како претседател на ВМРО-ДПМНЕ ја претставува Македонија. На настанот се очекува да присуствуваат повеќе од 2.000 учесници, дел од кои и лидери на институциите на ЕУ, а кои доаѓаат од Европската народна партија, шефови на држави и влади, партиски лидери, министри, национални и европски парламентарци и делегати на партиите членки на Европската народна партија.
Се очекува на Конгресот македонската делегација да оствари контакти и интензивна комуникација со повеќе европски лидери.
Европската народна партија е најголемата политичка партија на европско ниво, со 12 шефови на влади на држави од Европската унија, 13 членови на Европската комисија како и со најбројна група во Европскиот парламент. Таа претставува најголемата и највлијателна политичка партија на повеќе одлучувачки нивоа во ЕУ.
Меѓу присутните на Конгресот во Даблин се и германската канцеларка Ангела Меркел, шпанскиот премиер Мариано Рахој, полскиот премиер Доналд Туск, премиерот на Унгарија Виктор Орбан, како и актуелниот претседател на Европската комисија Жозе Мануел Баросо и претседателот на Европскиот совет, Херман ван Ромпуј.
