ТОП,Македонија

Груевски се сретна со премиерот на Обединетите Арапски Емирати

Груевски се сретна со премиерот на Обединетите Арапски Емирати
Груевски се сретна со премиерот на Обединетите Арапски Емирати

Претседателот на Владата на Република Македонија, Никола Груевски, денеска во Дубаи, Обединети Арапски Емирати, оствари средба со премиерот на Обединетите Арапски Емирати, Шеик Мохамед бин Рашид Ал Мактум, кој во исто време е и Владетел на Емиратот Дубаи.

На средбата, соопштуват од Владата, била истакната заложбата на двете страни за унапредување на севкупните односи во сите сфери од взаемен интерес.

Двете страни потенцирале дека помеѓу двете земји нема отворени прашања и ја констатираа потребата за интензивирање на политичкиот дијалог преку средби на високо ниво, што би придонело и за интензивирање на соработката на економски, културен, образовен план.

Соговорниците особено ја истакнале потребата и интересот за унапредување на економската соработка.

gruevski-poseta1

-Беше констатирано дека постои голем простор и потенцијал за зголемување на надворешно трговската размена помеѓу двете земји. Премиерот Груевски потенцираше дека македонското стопанство поседува потенцијал за производство на производи кои може да се пласираат на пазарот во ОАЕ, особено во делот на земјоделството. Особен акцент беше ставен на можностите за унапредување на соработката на полето на инвестициите. Премиерот Груевски истакна дека Република Македонија овозможува услови за водење на бизнис, за што има креирано пакет на ниски трошоци за економските субјекти, и дека Обединетите Арапски Емирати може да ја користат нашата земја како порта за реализација на економски операции во Европа. Стана збор и за опциите за соработка на економски план на меѓудржавно ниво, информираат од Владата.

Претседателот на македонската Влада, истакна и конкретни можности за соработка на ова поле, претставувајќи ги проектите за инвестиции во енeргетскиот сектор со осврт на гасификацијата на земјата и можностите за изградба на хидроцентрали, инвестициите во туризмот преку туристичките слободни зони и инвестирањето во недвижности и градба на хотели, инвестициите во земјоделството и производството на храна и други проекти кои би можеле да бидат предмет на интерес на Емиратите.

gruevski-poseta2

Груевски го покани Шеикот Ал Мактум да ја посети Република Македонија, со што би се продолжил дијалогот на високо ниво и би се конкретизирале можностите за потенцијална економска соработка.

Шеикот Ал Мактум даде позитивна оценка за економските политики на нашата земја и го изрази интересот во следниот период да ја разгледа можноста за посета на нашата земја.

Во рамки на средбата беше потпишан и Договорот за одбегнување на двојното оданочување помеѓу Република Македонија и ОАЕ кој ја дава основата и ги зголемува капацитетите за продлабочување на економската соработка.

dogovor-mk-oae

dogovor-mk-oae1

Беше договорено во идниот период претставници на двете страни да работат на финализирање на Договорот за заштита на инвестициите кој би претставувал основа и би ги обезбедил правците за конкретна соработка на полето на инвестициите.

Соговорниците разговараа и за политиките кои ги реализираат двете земји во образовната сфера, додавајќи дека образованието е најдобра основа за обезбедување на економскиот раст и развој на земјите.

gruevski-poseta3

Обединетите Арапски Емирати е значaјна држава во регионот на Заливот, која се карактеризира со висок економски раст и развој. Според проценетиот раст на БДП се наоѓа на 7-то место во светот оваа година. Емиратот Дубаи, покрај Абу Даби е еден од двата главни емирати во земјата. Се карактеризира со економски раст базиран на инвестиции, на услуги и има позитивен раст во сите економски сфери.

Премиерот Груевски во рамки на посетата на Обединетите Арапски Емирати ќе оствари средби со политички и економски претставници и субјекти од земјата домаќин. Покрај посетата на Емиратот Дубаи, премиерот Груевски ќе го посети и Емиратот Абу Даби.