Во името на Владата на Република Македонија и во негово лично име, премиерот Никола Груевски на сите сограѓани, припадници на ромската етничка заедница, со искрена желба за многу здравје, радост и среќа им го честита 8 Април – Меѓународниот ден на Ромите.
„Вреднувањето на различноста и културните посебности на секоја заедница која е дел од нашето мултикултурно општество е традиција на која сме посебно горди. На овој ден Македонија ја обележува културната специфичност и традиции на ромската заедница која е една од најстарите на нашата територија. Со Вашата единствена и препознатливa култура Вие ја збогатувате разноликоста по која нашата држава е препознатлива“, се вели во честитката.
Премиерот нагласува дека силата на нашата земја потекнува токму од нашите различности.
„Начинот на кој го стимулираме развојот на етничкиот, религиозниот и јазичниот диверзитет е доказ за слободоумието и инклузивната култура која е белег на македонското општество. Во оваа насока и во иднина ќе продолжиме да работиме. Ќе го развиваме мултикултурализмот и активно ќе продолжиме да го поддржуваме соживотот, соработката и хармонијата на нашето општество. Таквиот принцип на братство и пријателство значи и дека проблемите и предизвиците со кои се соочува ромската заедница во Република Македонија не се само Ваши, тие не засегаат сите нас. Отворањето на нови работни места, подобрувањето на здравството, унапредувањето на образованието и целокупната изградба на земјата зависат само од нас и од подготвеноста да функционираме како целина, сложно и посветено. Иднината на Македонија е иднина на Ромите и наша заедничка иднина, која можеме да ја изградиме онака како што посакуваме само преку сплотеност и заедништво, како што тоа сме го правеле и во минатото“, се вели во честитката на премиерот.
Груевски на припадниците на ромската заедница им посака добро празнично расположение, среќа и бериќет во семејствата.