Груевски: Судството е во спрега со власта, процесите против мене се апсурдни

Судството е во спрега со власта и дел од судиите се целосно заробени по принципот на делење награди или давање казни, рече во интервјутот за вечерниот Дневник на ТВ Сител, поранешниот премиер Никоал Груевски истакнувајќи дека не било така додека тој бил премиер.

„Така не беше во мое време, така велеа но јас никогаш не сум бил во комуникација со судии, сега првпат. Не познавав ниту еден судија во мојот живот, моите пријатели биле од сферата на политиката и економијата. Не познавав судија претходно“, рече Грувски.

Според него предметите на СЈО кои се водат против него се политички монтирана хајка.

„Во ТНТ инвеститорот сам признава дека изградил дивоградба. Во Титаник има редица непостоечки, измислени работи, поврзани со ткн. злосторничко здружување, повреда на избирачки права. Класични инсинуации дека со Мартин Протуѓер нешто сме се договарале. Не постои такво нешто, ниту има потпис, ниту сведоци против мене. Протестите во Општина Центар каде сум обвинет за поттикнување насилство, удирање шамари, тие шамари ниту постоеле, ниту биле удрени“, додаде Груевски.

Поранешниот премиер и почесен претседател на ВМРО-ДПМНЕ во Дневникот на телевизијата Сител вели дека сите случаи на Специјалното јавно обвинителство во кои тој е обвинет се слични на случајот „Тенк“. Според него, станува збор за политички мотивирани процеси.

„Најеклатантен е примерот кај случајот со патиштата, ткн ‘Траекторија’ каде што се создава едно широко распространето мислење дека таму сум земал провизии, за поткуп, а всушност обвинет сум за истото како во ‘Тенк’“, рече Груевски.

Појасни дека обвинет е зашто сакал да оствари политичка корист, односно затоа што сакал патиштата да се завршат пред редовните избори и да се стекне со корист кај гласачите. Додаде дека тоа е апсурдна ситуација, додавајќи дека улогата на еден политичар и премиер е да гледа побрзо да се завршуваат проектите.

„Обвинет сум по истиот член, за вршење влијание за се оствари корист, ама не корист – материјална, парична. Тоа е друг член. За поткуп, тоа е друг член. Ова член што укажува на некоја друга корист и таму е наведено дека јас сум ги форсирал за побрзо да се заврши итн. Во јавноста со сите сили, пропагандната машинерија на СДСМ се обидува да се искреира слика дека се работи за некаков поткуп, провизии. Дури и така го нарекуваат случајот ‘провизиите за патиштата’, а не сум обвинет за провизии, ниту пак, постојат провизии“, појасни Груевски.

За случајот „ТНТ“ рече дека станува збор за класична дивоградба за која инвеститорот добил градежна дозвола.

„Тој требал да изгради три нивоа подземна гаража. Кога дошле до второто ниво излегла вода и сфатил дека ќе треба дополнителни околу два милиони евра да инвестира. Сметајќи на својот политички ангажман, ценел дека ќе го среди тоа некако политички и дал насока да не се гради третото ниво. Подоцна, откако се открива случајот тој самиот го признава, затоа што доставува до општината барање во кое што вика „Ве молам да ми го преправите од минус 3, значи три нивоа под земја, на минус 3. Самиот си признава дека изградил дивоградба“, прецизираше Груевски.

Потенцираше дека тој лично ја донел одлуката, туку станува збор за локален случај за кој одлучуваат општините, или во овој, Општина Гази Баба.

„Немаат поинаков начин како да постапат, имаат правилници. Тоа е процедурата“, уверува Груевски.

Вели дека во спротивно, во иднина кога ќе се отвори ревизија ќе се види дека општинскиот работник направил кривично дело.

Во однос на случајот „Титаник“, Груевски потенцира дека е обвинет за редица непостоечки, како што рече, измислени работи поврзани со т.н. создавање на злосторничко здружение, повреда на избирачките прави и финансирање на партијата.  Рече дека не постојат никакви докази за такво нешто.

„Ниту има материјален доказ, ниту имаат сведоци против мене, дури ниту во оние креирани разговори нема такво нешто кое што може да го поттикне тоа тврдење“, рече Груевски.

Во однос за случајот со протестите во Општина Центар, почесниот претседател на ВМРО-ДПМНЕ вели дека обвинет за поттикнување насилство, односно удирање на „шамари“.

„Ниту шамари постоеле, ниту биле удрени, ниту се случило нешто. Но еве, веќе година дена ме влечкаат по судови во еден апсурден случај“, рече Груевски.

Доколку преземете содржина од оваа страница, во целост сте се согласиле со нејзините Услови за користење.