Балкан

Ѓукановиќ: Опозицијата сака да го суспендира евроатлантскиот пат на Црна Гора

Ѓукановиќ: Опозицијата сака да го суспендира евроатлантскиот пат на Црна Гора
Ѓукановиќ: Опозицијата сака да го суспендира евроатлантскиот пат на Црна Гора

Црногорскиот премиер Мило Ѓукановиќ во интервју за Хрватската радио телевизија (ХРТ) протестите на опозицискиот Демократски фронт во Подгорица ги оцени како обид за дестабилизација на земјата.

Тој за саботните немири во Подгорица, при што беа повредени 40 луѓе, ги обвини организаторите на протестот.

– Во еден момент, како што можевте да видите, тоа прерасна во отворено, брутално насилство, во обид за заземање на државните институции, значи имаше обид насилно да се урне власта поради промена на курсот на државната политика. Секако, полицијата мораше да одговори, а тоа е во согласност со Уставот и законот и полициските овластувања во такви ситуации. Тоа беше обид за загрозување на уставниот поредок на Црна Гора, со јасна амбиција да дојде до насилна смена на власта и ревизија на стратешкиот правец на државната политика на Црна Гора, посочи Ѓукановиќ.

Тој истакна дека Демократскиот фронт не само што сака промена на власта туку сака и суспензија на европскиот и евроатлантскиот пат на Црна Гора.

– Според мое длабоко уверување, сакаат да се поништат резултатите од демократскиот референдум од 2006 година, за да се елиминира можноста Црна Гора како независна држава сама да ја избира својата политика и секако да се врати во гравитациското поле на политика од соседството и од подалечни адреси, кои не само што сакаат да управуваат со Црна Гора туку и со регионот, наведе Ѓукановиќ.

Според него, нема сомнеж дека Русија имала, и понатаму има, активна улога во антивладините протести.