Македонија

Холандските инвеститори се запознаваат со можностите за инвестирање во Македонија

Холандските инвеститори се запознаваат со можностите за инвестирање во Македонија

Владина делегација предводена од премиерот Никола Груевски денеска ќе престојува во Хаг, Холандија, каде пред повеќе големи холандски компании ќе ги презентира можностите за инвестирање и поволностите што ги нуди државата за водење бизнис.

Во составот на македонската делегација се и министерот без ресор задолжен за привлекување странски инвестиции Џери Наумоф и заменик директорот на Агенцијата за привлекување странски инвестиции Климент Шекеровски.

Бизнис форумот се организира во соработка со холандскиот Совет за промоција на трговијата и Светскиот трговски центар на Холандија.

Неколку холандски компании веќе имаат инвестирано во Македонија и имаат позитивно искуство од развојот на своите бизнис планови што покажува дека постои значителен потенцијал и интерес за зајакнување на инвестициската соработка и трговската размена во неколку области како што е туризмот, земјоделството, текстилната и технолошката индустрија.

Холандија е една од најразвиените европски економии со многу можности за соработка. Република Македонија и Холандија во последните неколку години имаат нагорен тренд на развој на економските односи и позитивна трговска размена.