Хуманитарна помош од Русија за поплавените подрачја

Хуманитарна помош од Руската Федерација, наменета за поплавените подрачја, денеска ќе пристигне на Аеродромот „Александар Велики“ во Скопје.

Помошта се состои од мобилни дизелни и бензиски генератори со моќност од 5 до 120 kW, специјални пумпи и пумпена опрема, ќебиња, конзерви од риба и месо.

Како што соопштија од Амбасадата на Русија во Македонија, хуманитарната помош ќе биде доставена со специјален авион „Ил-76“ на руското Министерство за цивилна одбрана, вонредни состојби и отстранување на последиците од елементарни непогоди.

Од Амбасадата информираат дека деновиве специјалистите на руското Министертво учествуваат во доделување хуманитарна помош низ светот, односно, отстранување на последиците од големите поплави во Централната Русија, шумските пожари во Португалија, големите хуманитарни операции за испорака на храна и лекови за цивилното население на југоисточниот дел на Украина и на Сирија. Покрај тоа, Русија изрази подготвеност да испрати специјалисти и хуманитарна помош во Италија по разурнувачкиот земјотрес.

Доколку преземете содржина од оваа страница, во целост сте се согласиле со нејзините Услови за користење.